كأم يومي بخلص من قبل ما احس انه بلّش احيانا 😅
طبيعي ما يكون عندي يوميا انجازات على الصعيد الشخصي لهيك بحرص اني اعمل ٣ شغلات على الاقل في مجال تطوير الذات ولو انجزتهم بجزء بسيط بكون ممتاز،،،
دائما بذكر حالي؛ "قليل مستمر خير من كثير منقطع"
اللي همي:
1. قراءة قرآن
عادة بقرأ من الورد اليومي اول ما اصحى من النوم بس احيانا بنشغل بأشياء تانية اول ما اصحى لهيك ممكن بأي وقت خلال النهار او حتى بس اجي انيم الاولاد... وبالنهاية كل ما قرأتي قدام اطفالك وجهرا كل ما كان احسن...... منه بتسمعيهم صوتك بالقرآن وبتساهمي انهم يتعودوا على سماعه، ومنه بشوفوكي وانتي بتمارسي هالعادة يوميا وهالشيء بساعد انها في يوم تصير من عاداتهم بإذن الله..
2. تاني شغلة هي القراءة من كتاب... بالعادة في كتاب بقرأ منه يوميا لحد ما اخلصه وفي كتب تانية بتصفحها كل كم يوم...
وبرضو احيانا ممكن اقرأ بصوت عالي امام اولادي كونه المكان الوحيد تقريبا اللي بيسمعوا فيه عربي وعربية فصحى هو البيت.
3. اما تالت اشي فهو سبب كتابتي لموضوع اليوم وهو الاستماع... انا بطبعي شخص سمعي وكتير بحب احط هالسماعات بأذني واستمع لشيء واعمل شيء اخر بتفس الوقت او انام... هالشيء عندي اسهل من اني احضر عالتلفزيون... ونحن بالبيت عنا كتير مهام ممكن نستمع لشيء ونحن نعملها،،، طبخ، جلي، تنضيف، ترتيب وايضا وقت النوم..
وصح كتير احيان ما بقدر اسمع اشي ولا اركز بإشي مع اولادي وبرأيي هم بيستاهلوا التركيز اولا،،، بس يعني بستغل لحظات هدوئهم او انشغالهم بأمر ما.
طيب الكتب الصوتية خيار ممتاز لكن حاليا وعشان وجود الاولاد كمان بفضل استمع لاشياء قصيرة المدة لذلك حاليا متوجهة لليوتيوب غالبا ورح اقترح عليكم برامج وقنوات مفيدة لتسمعولها:
1. برنامج "ومحياي" للدكتور وليد فتيحي بكل اجزاؤه رهيب بكل ما تحمل الكلمة من معنى وصعب اوصفه عنجد... حرام تضيعوه.
2. قناة فكر تاني للدكتور كريم علي.
3. قناة مصطفى حسني، اخر برنامج اله "على ابواب الفتن" وبرامجه الاخرى كلها قيّمة.
4. اي شيء لمحمد راتب النابلسي 👍🏻
5. السليط الاخباري
6. قناة دروس اون لاين مفيدة لتعلم اللغة الانجليزية وامور اخرى كتيرة.
7. ولا بأس ترجعوا تحضروا خواطر بجميع مواسمه واي شيء لأحمد الشقيري 😌.
8. تيديكس... في تطبيق لتديكيس فيكم تحملوه ايضا وتستمعوا من خلاله.
9. قناة شرايها عليا
وشكرا الكم بتمنى اكون فدتكم... لكن تنبيه ما تطيلوا من استخدام سماعات الأذن اكثر من المعقول ولا تعلّوا الصوت كتير ويفضل تحطوا تلفوناتكم على وضع الطيران اثناء النوم 😴
بقلم Fatima z alsharif
