كمختصة نفسية ، كتير كان مفاجئ بالنسبة إلي اديش الأهل بيطلبوا المساعدة بموضوع التبول اللاارادي عند الأطفال،
كنت متوقعة وقت اشتغل بالمجال النفسي مع الأطفال خاصة لاقي اضطرابات نفسية تانية ..
واضح اديش هالمشكلة متعبة بالنسبة للطفل و بالنسبة للأهل ..
و كتير واضح بالنسبة إلي كمان اديش في مشاعر خجل و عار مرتبطة بهالقصة ، و اديش مستوى المسخرة على هالطفل من قبل أقرانه ..
و اديش بيتم التعامل مع الطفل بتطنيش كبير لمعاناته ..
المشاعر المرتبطة بهالمشكلة كتير سلبية سواء للأهل او الطفل..
الأهل ممكن يعتبروا حالن أهل غير جيدين ، كتير ممكن يلقوا اللوم على حالن ، و ممكن يحسوا بخيبة امل مرتبطة بابنن و خاصة اذا كانت توقعاتن منه كتير كبيرة ، في كتير من الأهالي عندن توقع انه ابنن مجرد ما طبق السنة سنة ونص بالكتير هو قدران يكون نظيف و يعرف يستخدم الحمام علما انه علميا المدة اطول من هيك ، يعني عادة الأطفال بدن لعمر ٣ سنين حتى يقدروا يستخدموا الحمام بشكل أفضل .
و طبعا كتير ممكن أنه التبول اللاارادي يعمل مشكلة بالعلاقة بين الطفل و أهله .
✨بعمر ٥ سنين من ٥_١٠٪ من الأطفال بعانوا من مشكلة التبول اللاارادي ،
✨ أما بعمر ١٠ سنين فالنسية من ٣_٥٪ .
لهيك المشكلة شائعة جدا
منقول من علا عرفة
