تعالي احكيلك قصة الشفرة .. و ليش لازم تعطيها فرصة 🙊
بس عادي مو اجباري كلامي هو نصيحة.. الك الحرية تاخديها او تكبيها بالبحر 🏃🏻♀️
آخر كلام فيما يخص راحتنا من شعر الجسم و قرفه و تزهيقه النا .. هو الليزر ، (مش حل نهائي بنسف الشعر عن الوجود)، لكن بريح و الاغلب اجمع على كدة .. 💃🏻
لإنك ازا التزمتي فيه بتوصلي لمرحلة انك تحتاجي رتوش (يعني جلسات تشييك) بينها فترات منيحة من تلت شهور لسنة .. (حسب كل بنت و التزامها و طبيعة جسمها) .. 😍
(يعني ما رح تضلي تدفعي مصاري للأبد و كل شهر)💸
و رح تقعدي بالأشهر بدون شعر ولا ازالة شعر .. الله 😍
(يلي بتحب احكيلكم عن الليزر من الألف للياء و كيف تعملي خطة مادية اله تسهله تحكيلي بالتعليقات) ❤️🔥
طيب شو علاقة هاد الحكي بالشفرة ؟ 🤔
أولاً 👈🏻 من لحظة بداية استخدامك لليزر ممنوع استخدام اي وسيلة نزع شعر فقط مسموح الحلاقة .. عشان الليزر يكون اله مفعول (ليزر و نزع شعر = مصاري بالزبالة)
بكون مسموحلك حلاقة لمرة وحدة بين الجلسات خصوصي لما يتباعدوا او صار عندك ظرف و تأخرتي عن جلستك .. و لازم اصلا تصيري تحلقي بالشفرة قبل كل جلسة عشان اقصى استفادة .. يعني مضطرة تتعلمي استخدام الشفرة ازا قررتي تختاري اريح وسيلة وصللها العلم لحد الآن و هي الليزر ✅
تانياً 👈🏻 برأيي الشخصي ، عند كل بنت لازم يكون في تلت اهداف مادية عالأقل بحياتها همة :
تتعلم سواقة و تشتري سيارة.🚗
تحوش و تعمل مصدر دخل خاص فيها. 💰
تحوش و تعمل ليزر. 🔫
فيمكن صعب حالياً عند كتير بنات انها تفكر بالليزر عشان مادياً .. بس نصيحة لازم يكون من اهدافك. 💞
فَ من هون لحد ما يصحلك و تقدري تعمليه لليزر ان شاء الله
حرام و محزن انك تضيعي وقت و جهد و دبق و ألم و عوَفان حال و فرفطة روح عشان تنزعي شعرك .. ! أنا مني و علي كنت هيك و هلأ ندمانة على كل جلسة دبق كنت ابلي حالي فيها .. أورط و احتار بين اوقف ولا اكمل و يا ريتني ذكر و نفسي اموت😭
الشفرة مع طريقة الاستخدام الصحيحة رح تخليكي تندمي عالأيام يلي قبل و تحمدي ربنا انه هداكي و نجاكي من لعنة قبع الشعر 😂😍
✅سرعة خلال تلت دقايق بتخلصي كل جسمك
✅ نعومة يومية مش مضطرة تشوفي خلقة الشعرة اصلاً
✅ رخيصة غير مكلفة و بتقدري تستخدميها من خمس لعشر مرات ازا خزنتيها بالطريقة الصح
✅ ما بتكثف شعر ما بتكثف شعر ما بتكثف شعر
✅ كزوجة دايماً جسمك نضيف و ما بدك شهر تخطيط و ورشة تنضيف عشان سهرة عشاء رومنسي مع زوجك
✅ كحامل مش مضطرة فجأة تصيري دب مشعراني عشان مش قادرة
✅ كأم مش محتاجة تشحدي الوقت شحدة عشان تحافظي ع انوثتك
✅كبنت عادية فش وراكي اشي .. النضافة حلوة و كل ما قل الجهد و الوقت بنصير قادرين نحافظ عليها اكتر و نلتزم اكتر 😍
عرفتي ليش الشفرة ليش ؟
ساعة و رح انزل طريقة استخدامها الصحيحة و كيف اخليها تعطي نتائج و ملمس حِلِس مِلِس 😍💃🏻
✅ الطريقة الصحيحة لاستخدام الشفرة🪒✅
الشفرة، في نوعيات كتير ، بتنجاب من اي صيدلية، طبعاً شفرة نسائية مش نفس تاعت الرجال، في انوع ثابتة و انواع برأس متحرك .. استخدمي يلي بتناسبك
لكن اهم اشي ⚠️
ما تستخدمي شفرة مستخدمها شخص غيرك ❌
شفرة جسمك ما تلمس وجهك(شفرة الوجه نوع مختلف)❌
انتبهي لعدد مرات الاستخدام ، لا تتركيها بالحمام لانه بتصدي بتجمع بكتيريا بقل عدد مرات استخدامها بتعمل التهابات بالجلد❌
لازم بمكان جاف و تسكريها بالكڤر تبعها بعد ما تنشفيها✅
عقميها بسبيرتو او اغسليها قبل كل استخدام ♻️
لا تستخدميها على جلد جاف ابداً هيك بتعمل جروح و بتطلع شعر تحت الجلد و بصير جلدك خشن ⚠️
الشفرة ازا مسكتيها صح و ما كنتي عشوائية و دفشة مستحيل تجرحك، يعني تخافيش مستحيل يفكروكي منتحرة بالحمام و انت كاينة تحلقي ⚰️
ازا كنتي ملتزمة بروتين ازالة الجلد و ترطيب الجسم.. (موووستاااحيييل) يصير عندك جلد الإوزة او الجاجة، مستحيل يطلعلك شعر تحت الجلد، مستحيل تكوني خشنة🧴🛁
الشفرة ما بتكثف الشعر (الشعر الاسود يلي بيطلع عالساقين و الذراعين و البكيني و الإبط)، بس⚠️
المناطق يلي شعرك فيها وبري فاتح زي البطن الظهر احياناً الفخاد و الايدين من فوق من عند الكتاف ، هدول لا تحلقيهم بأي وسيلة لانه اه رح يغمقو و يتغيرو .. الحل يلي انا بفضله ، تشقريهم (التشقير بقعد فترة منيحة) 👩🏻🦳
الشفرة بتقص الشعرة ما بتنزعها من جذورها، فطبيعي انها تطلع اسرع .. بس احنا اصلا بدناش نستنا اشي يطلع ولا بدنا نشوف شعر بحياتنا نهائي .. و لإنه احنا بنات امورات فرفوشات ما بدي احكي بنتحمم يومياً ، لكن يوم بعد يوم .. بالكتير كل يومين ، (سواء متزوجة او لأ)
بنهاية كل حمام من تلت لخمس دقايق زيادة .. بتشييكي كل جسمك ، ما بدي احكي بتحلقي لانه اصلا الشعر يا دوب مبلش يطلع بس انتِ بدك تلعني ابوه ما تخليه يشوف ضو الدنيا هالحقير .. سوري تحمست 🌚
المهم ازا كنتي بتتحمي بالاسبوع مرة و حماماتك كتير بعاد عن بعض انسي الشفرة طلعيها من حياتك😒
الخطوات:📶
بتتحممي حمامك العادي .. دايماً الحلاقة اخر الحمام عشان يكون جلدك طري من المي الدافية ، 🚿
المي لحالها ما بتكفي لازم تحطي ع جسمك مادة ملينة عشان تسهل مشية الشفرة عالجلد و تكون ناعمة .. في كريمات حلاقة .. بدكيش تتكلفي .. ابسط اشي ممكن تعمليه هو تليفي جسمك و تتركي الرغوة عليه 🧼
بعدين تحلقي 🪒
الحلاقة بتكون مع اتجاه الشعر بالبداية و بدون ما تضغطي كتير عادي بنعومة و انسياب، المسافة يلي بتمشيها للشفرة خليها قصيرة مو طويلة .. هيك الشغل بكون ادق اكتر ♻️
انتبهي بمناطق المفاصل زي الركب و الكوع لازم مسافات قصيرة قدر الامكان و رقة عشان ما تتجروحي تطلعي ازعر من الحمام 🚬
في حال عندك موعد سكراب اليوم اعملي قبل الحلاقة مش بعد .. السكراب رهيب لملمس جسمك ❤️🔥
خلصتي حلاقة .. كبي ع جسمك مي باردة ، بتسكر المسامات و بتشد الجسم و انتعاش 😍🚿
لسا ما خلصنا ، ازا عملتي كل هاد بدون خطوة (الترطيب) ، كإنك يا ابو زيد ما غزيت 🤦🏻♀️
برجع بعيد ، احسن و ارخص اشي ما بدبق ما فيو عطر خفيف عالبشرة ما بعمل تحسس بتتشربه الجلد بسرعة ((بيبي اويل)).. جوا الشاور قبل ما تطلعي دلكي كل جسمك و اطلعي 🧴
اطلعي و البسي تنورة و اقعدي رجل ع رجل و عيشي انوثة منعشة مش مكلفة سريعة بدون ألم بدون وجع رقبة بدون سمة بدن 😍👗💃🏻
منقول من لما صالح
