ارخص وأسرع واسهل روتين عناية للوجه يكلف أقل من دينار اخضر💰🔥
🌸 صناعة وجه الكيكة الأمورة بالمنزل🍰🍓
🌸خطوات تنويرة الوجه للعيد💡🌸
قومي بدون اي حجج الحل موجود بالدار و ما بده كتير عشان تنجزيه ..
⚠️ملاحظة: اختبري و اتأكدي انه كل شيء قبل استخدامه بناسب نوع بشرتك او لأ تجنباً للتحسسات و الوجه المحمرط صباح العيد.
⚠️ روتين العناية هاد لو بتعمليه اسبوعي بتضلك امورة ع مدار الشهر و بتلاقي تحسنات و تغييرات للمشاكل المتراكمة يلي ما بتنحل بيوم و ليلة لهيك احفظيه عندك هو مو بس للعيد، فضي حالك ساعتين اسبوعياً(خلقتك تستحق).💞
الخطوة الاولى .. فتح المسامات لاستقبال عمليات الشطف و التلميع 👇🏻
امسحي اي بواقي مكياج او كحلة سايحة اوتعرق من التعزيل عن وجهك و غسليه بالمي الفاترة .. 🤡
جيبي اناء فيو مي مغلية مع بابونج حطيه عالطاولة ، و قبل ما يبرد و يروح بخاره كوني مجهزة منشفة حطي وجهك قبال البخار بس بدون ما تلزقي بالمي و تحرقيه🤦🏻♀️ اتركي مسافة ما بدنا ننحرق و نسخن المهم البخار يتكاثف ع سحنتك عشان يرطبها يلينها يفتح مساماتها
و حطي طبعاً المنشفة ع وجهك و الاناء عشان تسيطري عالبخار انه ما يتكاثف ع كاسة النسكافيه يلي جمبك و ع حواجب اختك يلي ملزقة بتحكي معك .. 💦
خليكي عشر دقايق لربع ساعة ، صفي ذهنك فيهم و احسبي عيديتك المتوقعة و حاولي تحسي بالسلام حتى لو ظهرك متشنج من التعزيل🔮
(اقرئي عن فوائد تبخيرة البابونج و كيف بتناسب كل انواع البشرة حتى الحساسة) 🌼
ما عندك بابونج ؟ مش مشكلة مي مغلية لحالها بتكفي.
الخطوة التانية:
الوجه هسا طري و الجلد الميت و الشوائب و الزيوت مفشفشين و سهل حفهم، سهل حفهم يعني لا تحفي و تشدي و تفركي حضرتك، حركات دائرية بضغطة خفيفةجداً بروس اصابعك بكل دلع يا دلوعتي 🌚 ، دلكي وجهك بسكراب الوجه لمدة عشر دقايق رايحة جاي اشي جبينك اشي راس انفك و جوانبه اشي حوالين تمك و شفايفك لا تنسي رقبتك من مرة ايديكي ، استمتعي بتدليك كل دونم من وجهك بس بدون فرك و دعك يرضالي عليكي، وجهك بالذات كل ما تحتي و تشدي تخسري مو تكسبي.. 🌝
ابسط واسهل سكراب للتقشير (اقرئي عنه) :
ملعقة سكر + ملعقة زيت زيتون +كم نقطة عصير ليمون(اختياري الليمون) 🍋
١٠ دقايق تدليك و غسليه بمي فاترة و استخدمي غسول بشرتك بعده عشان تشيلي آثار الزيت.
الخطوة الثالثة: تنظيف البشرة و ازالة الرؤوس السوداء و شد المسامات و نضارة الوجه و تغذية البشرة .. 💃🏽
كل هدول بمكون واحد بس هيني بحكيلك تأكدي انه وجهك ما بتحسس منه ، اعمليله تيست قبل ما تحطيه ع وجهك عشان ما تدعي علي بصلاة العيد هيني نبهتك و بريت ذمتي.. ⚠️⚠️ و مش غلط تقرأي عنه و عن فوائده و محاذيره.
بياض بيضة وحدة 🥚 ، بصحن حركيه منيح ، وجهك مجفف و نضيف المفروض ، ادهني طبقة بيض عليه، جيبي فاين و قطعيه اجزاء و اعملي منه طبقة ع وجهك زي قناع ، ارجعي ادهني كمان طبقة بيض فوق الفاين بس تتأكدي انه مسك ع وجهك .. اتركيه ينشف منيح ع وجهك، بعدين وقفي عالمراي و شيلي القناع من عند دقنك و ارفعي تدريجياً شوي شوي عبين ما تشيليه كله (زي العرسان بباب الحارة ليلة العرس لما يكشفوا عن وجه العروس) .. 🧖🏻♀️
غسلي وجهك منيح بمي فاترة مش باردة ولا سخنة و يلا نرطب لانه ضروري خطوة الترطيب.
الخطوة الرابعة: جرعة ترطيب و نضارة للوجه:🍯
بديش أكلفك كتير بس لازمنا قشطة و عسل عشان الكيكة تكمل قصدي سحنتك .. ازا التنين موجود ممتاز ازا واحد منهم بس برضه ممتاز 💃🏽👇🏻
(اقرأي عن فوائد القشطة للبشرة) وجهك ناشف و نضيف افردي عليه القشطة كإنه بايركس ليالي لبنان معلقة كبيرة بتكفي ما بدنا نغرق بالقشطة، و اتركيها ثلث ساعة تتغلغل براحتها ع وجهك بعدين غسلي بمي فاترة..
ازا الموجود عسل، اقرأي عنه، ملعقتين عسل مع ٨ معالق مي ليصير خليط افرديه ع وجهك ٢٠ دقيقة بعدين غسليه بمي فاترة برفق لو سمحتي ..
ازا متوافر التنين اخلطي منيح ملعقة عسل+ ملعقة قشطة و افرديهم ، تمددي تلت ساعة و تخيلي حالك قالب كيك 🥧 .
منقول من لما صالح
